Një tjetër kryebashkiak “bie”? Kjo pyetje ngrihet sërish pasi Prokuroria ka kërkuar formularin e dekriminalizimit të kryetarit të bashkisë së Librazhdit, Kastriot Gurra.
Mësohet se kërkesa është bërë ditën e premte pranë Komisionit Qendror të Zgjedhjeve dhe po të premten, Prokurorisë i është dorëzuar informacioni i kërkuar.
Partia Demokratike nuk ka qenë në komunikim me Prokurorinë për këtë informacion, konfirmojnë burimet pranë kësaj partie.
Emrat e denoncuar deri tani nga Partia Demokratike janë; Valdrin Pjetri i Shkodrës që u largua; Agim Kajmaku i Vorës po ashtu u largua, por në kërkim nga policia; Mark Babani i Vaut të Dejës, Agron Malaj i Matit dhe Qerim Ismailaj i Mallakastrës.
Ndërkohë Prokuroria Speciale Anti-Korrupsion nisi hetimet për kryebashkiakun e Bulqizës, Lefter Alla, pas publikimit nga Televizioni ABC NEWS të një videoje, ku sipas autorëve, ai shfaqet duke thithur kokainë./ Opinion.al
