Partia Socialiste vijon që të mbajë në grupin parlamentar deputetin e përjashtuar nga partia, Armando Prenga.
Ish-deputeti socialist për Qarkun e Lezhës, Prenga, i cili është përjashtuar nga kjo parti që në muajin shtator të vitit të kaluar, vijon të jetë i regjistruar si deputet në grupin parlamentar të PS-së.
Deputeti Prenga, i cili që nga përjashtimi nga PS pas arrestimit të tij nuk ka marrë më pjesë në punimet e Kuvendit, në faqen zyrtare në faqen e Kuvendit të Shqipërisë, në grupin parlamentar të PS-së mban numrin rendor 58, ndër 62 deputetët e së majtës që janë në këtë grup parlamentar.
Gjithsesi, nuk dihet nëse PS e ka neglizhuar vetë një detaj të tillë për të hequr nga përbërja e grupit parlamentar deputetin Prenga. Bie në sy që kjo listë është rishikuar në muajin dhjetor, kohë kur grupit të majtë i është shtuar deputeti Eduard Ndocaj, çka i ka lënë hapësirë PS-së që të rishikojë përbërjen zyrtare që ka në grupin parlamentar.
Nëse deputeti Prenga nuk do të marrë pjesë në punimet në Kuvend deri në muajin mars, atëherë mandati i tij do të digjet, pas afatit prej 6 muajsh mungesë.
Gjithsesi, deputeti i Qarkut të Lezhës nuk e ka bërë me dije qëndrimin nëse do ta mbajë këtë mandat apo do ta dorëzojë, duke i dhënë mundësi Partisë Socialiste që të përfaqësohet me një tjetër deputet dhe një votë më shumë në Kuvend. Aktualisht, deputeti Prenga është në arrest shtëpie pas një vendimi të dhënë nga Gjykata e Lartë që në fund të muajit nëntor.
Në muajin shtator, Partia Socialiste, nëpërmjet deputetes Olta Xhaçka, do të njoftonte largimin e deputetit Prenga nga grupi parlamentar i deputetëve të majtë, pasi sipas saj, kjo parti nuk mund të ishte strehë për askënd që shkel ligjin.
Momenti i incidentit me armë zjarri në të cilin u përfshi Prenga ndodhi pikërisht në të njëjtën kohë kur palët politike kishin nisur bisedimet për hartimin e një ligji për dekriminalizimin, për të cilin kishin rënë dakord që procesi do të niste nga vetvetja.
Duke marrë shkas kjo nismë për ligjin, i cili së bashku me ndryshimet në Kushtetutë morën votat e mazhorancës dhe opozitës, PS u distancua nga veprimi i deputetit Prenga, i cili u akuzua nga Prokuroria për armëmbajtje pa leje si dhe plagosje e lehtë me dashje.
“PS dënon me forcën më të madhe sjelljet dhe veprimet që ishin pjesë e ngjarjes së turpshme në Laç, ku i përfshirë rezulton të ketë qenë edhe deputeti Armando Prenga. Po ashtu për çdo anëtar të partisë sonë, është e qartë se Partia Socialiste nuk është strehë ku mund të gjejë mbrojtje nga agjencitë ligjzbatuese cilido që shkel ligjin. Si shkelës i këtyre normave, Armando Prenga ka humbur çdo të drejtë morale të jetë pjesë e Partisë Socialiste, ndërsa si i dyshuar nga Policia e Shtetit për shkeljen e ligjit, ai duhet të japë llogari përpara drejtësisë për çdo akuzë që rëndon mbi të”, do të deklaronte deputetja Xhaçka në emër të Partisë Socialiste.
/gazeta Shqip/
