Kreu i grupit parlamentar të PD-së, Gazment Bardhi ka reaguar pasi PS ka hedhur poshtë kërkesën e opozitës për ngritjen e Komisionit Hetimor në Konferencën e Kryetarëve.
Përmes një postimi në rrjete sociale, Bardhi thekson se rrëzimi i kësaj kërkese është dëshmi e qartë se projekti nuk i shërben interesave të qytetarëve, por interesave private të Edi Ramës, Belinda Ballukut dhe klientëve të tyre.
Sipas tij, pengimi i hetimit ka si qëllim fshehjen për pak kohë të aferës korruptive të Portit të Durrësit.
“Refuzimi i mazhorancës për ngritjen e Komisionit Hetimor për Portin e Durrësit është dëshmi e qartë se projekti nuk i shërben interesave të qytetarëve, por interesave private të Edi Ramës, Belinda Ballukut dhe klientëve të tyre.
Një mazhirancë se ka bindjen se projekti është në interes të zhvillimit, pse ka frikë nga transparenca, pse ka frikë nga hetimi parlamentar, pse pengon ushtrimin nga opozita të të drejtës së saj për kontroll parlamentar?
Pengimi ka vetëm një qëllim: Të fsheh për pak kohë aferën korruptive të Portit të Durrësit, edhe pse ajo po del në sipërfaqe dita ditës.
E vërteta mund të pengohet të dalë plotësisht për pak kohë, siç u pengua për vite e vërteta për inceneratorët, por ajo nuk mund të pengohet përjetësisht. Përgjegjësit e kësaj afere do të mbajnë përgjegjësi të plotë, sado që të përpiqen, që në kundërshtim me Kushtetutën dhe me votë publike, të refuzojnë hetimin parlamentar”, shkruan Bardhi./Opinion.al
