Partia Demokratike ka reaguar pas draftit të Partisë Socialiste për të çuar në kuvend ligjin e ri organik mbi të cilin do të funksionojë institucioni i Presidentit të Republikës.
PD e ka cilësuar këtë ligj antikushtetues, me qëllim nëpërkëmbjen e Institucionit të Presidencës dhe kufizimin e kompetencave të kreut të shtetit.
“Ligji antikushtetues i Edi Ramës për të nëpërkëmbur edhe Institucionin e Presidentit të Republikës, është përpëlitja e fundit e një Kryeministri të degraduar nga pushteti i pakufishëm. Ky është shembulli tipik i një Kryeministri në ikje, që në panikun e humbjes së karriges, tenton të kufizojë edhe kompetencat kushtetuese të Kreut të Shtetit, duke shkelur Kushtetutën”, thotë PD.
Në qëndrimin e saj PD e cilëson këtë draft si një veprim i kryer nga Kryeministri Rama në luftën e tij personale politike për më shumë pushtet.
“Akti antikushtetues dëshmon sa larg realitetit është Edi Rama. Në vend që të zgjidhë hallet e qytetarëve, që po përballen me një krizë të rëndë shëndetësore, ekonomike dhe sociale, Edi Rama merret me luftën personale politike dhe listën e dëshirave të tij për më shumë pushtet. Për qytetarët vetëm fjalë, tallje, premtime të pambajtura dhe mashtrime. Për vetë pushtet dhe pasurim të paligjshëm. Në 25 Prill, shqiptarët do ta rezfuzojnë masivisht Kryeministrin e dështuar”, thotë PD në qëndrimin e saj.
Kujtojmë se kjo nismë e Partisë Socialiste vjen në një moment kur përlasjet mes Presidentit Meta dhe Kryeministrit Rama janë më të hapura dhe më të dukshme se kurrë më parë./Opinion.al
