Rrallëherë mbledhja e grupit të PS zhvillohet me dyert të hapura, ku media mund të transmetojë live. Kjo ka ndodhur sot…por vetëm për fjalën e kryetarit Edi Rama.
Kryetari i PS, foli për takimet që zhvilloi në SHBA dhe më pas media u largua, duke lënë deputetët socialistë të flasim në privatësi.
Rama gjatë fjalës së tij tha se është i vetmi Kryeministër që është pritur në Shtëpinë e Bardhë.
“Nuk ndodh çdo vit e as çdo katër vjet që kryeministri i Shqipërisë të pritet në Shtëpinë e Bardhë. Kjo në fakt është hera e parë që ndodh”, u shpreh ai.
Kryeministri Rama tha se gjatë takimeve të zhvilluara në SHBA, reforma në drejtësi është vlerësuar si moment kyç për vendin. “Kyçe është vlerësuar reforma në drejtësi. SHBA janë mbështetëset më të mëdha të Shqipërisë, dhe janë një avokat i fuqishëm në mbështetje të integrimit europian të Shqipërisë. SHBA kërkon që asnjë palë politike të mos pengojë në Kuvendin e Shqipërisë punën për reformën në drejtësi”, tha Rama.
Ai komentoi edhe lajmet në media, ku disa syresh e panë me skepticizëm rëndësinë e kësaj vizite. “Nuk e fsheh dot keqardhjen time për disa komente negative për këtë ftesë. Pavarësisht se kjo ftesë ishte një vlerësim për ne, për punën e bërë në gjithë këto vite. Kjo ftesë ishte një vlerësim për popullin shqiptar, në këtë 25vjetor të rivendosjes së marrëdhënieve midis vendeve tona”, tha kryeministri Rama.
