Deputeti i PD, Ervin Salianji në një prononcim për mediat tha se aksioni i opozitës vazhdon.
Ai tha se opozita nuk tërhiqet nga kërkesat e saj dhe nuk ka për të patur parlament normal derisa ato të realizohen.
Sa i përket, aksionit të sotëm opozitar, Salianji tha se ka vetëm diversifikim të saj dhe qëllimi është që me forma të ndryshme t’i tregohet opinionit se nuk po përfaqësohen interesat e qytetarëve.
“Sikurse e shihni, PS e ka vënë përfund edhe parlamentin, e rithemi që të gjitha institucionet i nënshtrohen vullnetit të Ramës, me një lehtësi ekstreme.
Kërkojmë bashkëkryetarin e Komisionit të Reformës Zgjedhore. Një parti me 7 deputetë nuk mund të ketë katër përfaqësues dhe ne të mos kemi asnjë të drejtë. Frika që ka mazhoranca për t’u përballur me hetimin parlamentar, fakton që janë të zhytur. Edhe njëherë sot, pavarësisht thirrjeve të faktorit ndërkombëtar, vazhdohet me teatrin e shpifur të kalimit të ligjeve brenda disa minutave. Po përpiqen ta kalojnë në Republikë të Edi Ramës.
Ka diversifikim të aksionin opozitar, për t’i treguar opinionit publik që këtu nuk po përfaqësohen interesat e qytetarëve. Nuk ka asnjë trembje, aksioni do të vijojë. Nuk ka tërheqje”, tha Salianji.
