Lideri demokrat Lulzim Basha duket se është treguar i hapur me komunitetin LBGT në Tiranë duke u hapur udhë që të zhvillojnë ata paradën dhe më pas të bëhet protesta e PD-së.
Siç tashmë e dimë opozita ka thirrur një protestë masive mbarë popullore të shtunën paradite në Tiranë. Por në të njëjtën ditë kishin parashikuar aktivitet edhe komuniteti LGBT. Për këtë arsye ata kanë takuar liderin e PD-së.
“Parada me biçikleta e planifikuar për datën 13 Maj do të zhvillohet sipas parashikimeve pavarësisht se në të njëjtën ditë opozita ka njoftuar mbajtjen e një proteste në Bulevardin “Dëshmorët e Kombit”- thuhet ne njofimin e LGBT-së .
Njoftimi i LGBT
Ju njoftojmë se ditën e sotme (e hënë 8 maj 2017) organizatorët e Paradës Xheni Karaj dhe Kristi Pinderi zhviluan një takim me strukturat e larta të Partisë Demokratike për t’u koordinuar.
Ky takim u zhvillua në një frymë bashkëpunuese. Gjatë takimit aktivistët LGBTI morën garancinë direkte nga kryetari i Partisë Demokratike Z. Lulëzim Basha se nga ana e mbështetësve të opozitës nuk do të ketë asnjë incident apo kërcënim për mbarëvajtjen e sigurt të këtij aktiviteti.
U ra dakord që orari më i përshtatshëm për zhvillimin e paradës të jetë ora 10:00, ditën e shtunë 13 Maj.
Nisja do të bëhet tek Pallati i Kongreseve, pjesëmarrësit do të pedalojnë në Bulevard dhe do të kthehen majtas në rrugën Ismail Qemali, do të futen në zonën e ish-bllokut (Rr. Ibrahim Rugova) dhe ashtu siç ishte parashikuar do të vazhdojnë përgjatë lumit të Lanës, do të kthehen tek ura në shkollën Vasil Shanto dhe do të vazhdojnë përsëri përgjatë Lanës.
Është e rëndësishme të kuptojmë se hapësira publike na përket të gjithëve dhe askush nuk mund të ndalojë të drejtën themelore të njeriut për t’u organizuar dhe për t’u shprehur.
Ju njoftojmë gjithashtu se në këtë paradë do të marrin pjesë aktivistë LGBTI nga i gjithë rajoni, mbështetës, aktivistë dhe pjesëtarë të komunitetit LGBTI nga Shqipëria si dhe përfaqësues të trupit diplomatik në Shqipëri.
