Në Serbi vazhdojnë protestat kundër Presidentit Aleksandar Vuçiç. Pas mësymjes në Televizionin Shtetëror serb, opozita ka organizuar një tjetër tubim në shesh, i cili ka nisur rreth orës 11:30 paraditen e së dielës. Ndërkohë, në një reagim të shkurtër, Vuçiç ka thënë se nuk do të lejojë askënd që të imponohet përmes dhunës.
Dje, deputetë dhe protestues hynë në Radio Televizionin e Serbisë me pretendimin se nuk transmeton asnjë prej protestave kundër qeverisë. Më pas, ata u nxorën jashtë nga forcat e rendit, duke shkaktuar tensione.
Ministri i Brendshëm serb Nebojsha Stefanoviç, paralajmëroi përndjekjen e atyre që hynë në ndërtesë, ndërsa ministri serb i Mbrojtjes, Aleksandër Vulin, i tha televizionit pro qeveritar Pink se protestuesit janë ‘fashistë” dhe duhet të dënohen me ashpërsi.
Ky ishte incidenti më i rëndë pas disa muajsh protesta kundër presidentit serb, teksa protestuesit po kërkojnë dorëheqjen tij, zgjedhje dhe media të lira dhe më shumë demokraci./Opinion.al
