Kryetari i Bashkisë së Tiranës, Erion Veliaj ka thyer heshtjen 12 ditë pasi studentët nisën protestën e tyre në sheshet e rrugët e Tiranës.
Kryetari i Bashkisë, që e nisi rrugëtimin nga shoqëria civile, lëvizja “Mjaft” tha se “admironte mënyrën si ata janë organizuar, por u kërkoi studentëve të ulen në bisedime.
Deklaratën e ka bërë për televizionin Top Channel.
Sipas tij, reformën në arsim shumë vetë e kanë keqkuptuar, ku rektorë dhe dekanë kanë marrë vetëm privilegjet dhe jo përgjegjësitë.
“Thirrja ime për studentët është: mos u influenconi nga partitë. E di që në çdo fakultet janë lacat e partisë që mundohen të ndezin zjarre të paqena. Thirrja ime është mos mendoni për politikanët që kanë hallin te zgjedhjet e ardhshme”.
Në lidhje me Kartën e Studentit, Veliaj tha: “Bashkia do ta emetonte nëse universitetet do të mbeteshin shtetërore. Përsa kohë që morën pavarësinë e tyre, kjo është një nga detyrat që duhet të bëjnë. Por, atë mund ta bëjë edhe bashkia me kënaqësi, por duhet të ulemi. Ka disa detaje që duhen diskutuar edhe për Kartën e Studentit”.
