Partia Demokratike ka bërë paraditen e së martës një kallëzim në prokurori për dhunën e ushtruar nga policia gjatë protestës së djeshme tek Parku i Liqenit.
Kanë qenë deputeti Arben Ristani dhe juristi Ivi Kaso që kanë dorëzuar kallëzimin penal në Prokurorinë e Tiranës.
Vetëm 10 minuta më pas ka qenë Policia e Tiranës që ka njoftuar se ka kallëzuar pranë Prokurorit të Përgjithshëm 9 deputetë të PD.
Sipas policisë, deputetët Flamur Noka, Genti Strazimiri, Genc Pollo, Albana Vokshi, Arben Ristani, Asllan Dogjani, Gert Bogdani, Edi Paloka, të shoqëruar nga protestues të tjerë çanë me forcë kordonin e Policisë Bashkiake, të Policisë së Shtetit me veprime të dhunshme, dokumentuar me prova filmike, raport shërbimi dhe dëshmi të tjera.
“Nga dhuna e ushtruar nga deputetët dhe protestuesit, u dëmtuan dhe po marrin mjekim në spitalin e Traumës, 3 punonjëse të Policisë Bashkiake.
Policia e Tiranës i ka referuar Prokurorit të Përgjithshëm kallëzim penal për 9 deputetë të subjektit politik Partia Demokratike, konktretisht: Gent Strazimirin, Flamur Nokën, Edi Paloka, Ridvan Bode, Asllan Dogjani, Gert Bogdani, Albana Vokshi, Genc Pollo, Arben Ristani”, thotë policia.
