Aktori, Mehdi Malkaj ka qenë një nga personat që ka protestuar sot para SPAK për çështjen e prishjes së Teatrit Kombëtar.
Gjatë fjalës së tij, Malkaj ka akuzuar shoqërinë civile për bashkëpunim me pushtetin, duke komentuar kështu mungesën e aktivistëve në protestën e Aleancës për Mbrojtjen e Teatrit para SPAK. Sipas tij, ata gjenden aty ku janë paratë.
“Përshëndes shumë ata që na shikojnë nga lokalet dhe nuk vijnë këtu, përshëndes shumë edhe këta që na shohin nga xhami, mbrapa. Një përshëndetje të veçantë e kam për atë që quhet Shoqëri Civile, që është kaq e mirë, kaq e dashur, kaq elegante me pushtetin dhe gjendet gjithmonë atje ku janë paratë. Ka ndonjë të shoqërisë civile këtu? Nuk ka, se ashtu e kanë hallin ata”, theksoi ai.
Aleanca për Mbrojtjen e Teatrit, këtë të mërkurë po zhvillon një protestë para SPAK, duke akuzuar Prokurorinë e Posaçme se po hesht ndaj padrejtësisë që është bërë për shembjen e Teatrit.
Protesta u mbështet edhe nga Partia Demokratike.
