Ndryshe nga çishte paralajmëruar më herët, pas arrestimit të deputetit Ervin Salianji, Partia Demokratike ka vendosur të shtyjë me 24 orë zhvillimin e protestës kombëtare.
Këshilli Kombëtar i mbledhur pasditen e sotme në selinë blu ka vendosur që protesta të zhvillohet më 7 tetor dhe jo më datë 6.
“Duhet të themi që përpara se të niste mbledhja burime nga anëtarët e Këshillit Kombëtar thanë që ishte propozimi që të mbahej në datë 7 tetor në orën 18:00 dhe jo të dielën, por ende pa arsye, pasi edhe zoti Berisha ishte i paqartë kur përmendi të dyja datat si 6 dhe 7 tetor. Ende nuk ka shpjegim zyrtar por ndoshta është lënë edhe për shkakun se është një ditë pune dita e hënë dhe dita e dielë është ditë pushimi dhe duan të reagojnë ndaj institucioneve kur të gjithë të jenë në Tiranë dhe të mos jenë larg kryeqytetit”, raportoi nga selia blu gazetarja e A2 CNN, Fjorela Beleshi.
Ky tubim do të nisë në orën 18:00 të pasdites nga kryeministria dhe më pas protestuesit do të shpërndahen në të gjitha rrugët e Tiranës.
Ndërkohë në vendimin e Këshillit Kombëtar të PD thuhet: “Ditën e hënë, datë 7 Tetor 2024, ora 18:00, fton qytetarët shqiptarë të bëhemi të gjithë bashkë në Tiranë, për të reaguar kundër padrejtësive me autor të vetëm Edi Ramën. Mospajtimi me padrejtësinë është mision i çdo qytetari të ndershëm shqiptar. Mospajtimi me të keqen fillon nga Kryeministria dhe shtrihet atë ditë në të gjithë rrugët e Tiranës.”
Është ende e paqartë nëse do të jetë një protestë që do të ndalet pas disa orësh në shesh apo në rrugë, apo do të vazhdojë, por gjasat janë që protesta të përfundojë me një skenar të mosbindjes civile.
