Qytetarë të shumtë kanë protestuar në të gjithë Australinë, kundra dhunës ndaj grave dhe vajzave.
Ata kërkuan që ky fenomen të shpallet një emergjencë kombëtare dhe të vendosen ligje më të rrepta për ta ndaluar atë.
Edhe kryeministri Anthony Albanese reagoi për këto tubime, ku u shpreh se çështja është një krizë kombëtare.
Duke folur në një marshim në kryeqytetin Canberra ku morën pjesë mijëra protestues, kryeministri Albanese pranoi se qeveria në të gjitha nivelet duhet të bëjë më mirë.
“Ne duhet të ndryshojmë kulturën, qëndrimet, sistemin ligjor dhe qasjen nga të gjitha qeveritë. Ne nuk kemi nevojë për një muaj apo dy muaj – ne duhet ta trajtojmë këtë në mënyrë serioze, javë pas jave, muaj pas muaji, vit pas viti”, shtoi ai.
Në Australi sipas të dhënave, janë vrarë 27 gra në 119 ditët e para të vitit 2024.
