Ministrja Elisa Spiropali është përplasur me Presidentin Ilir Meta në lidhje me protestën. Zonja Spiropali ka reaguar për arrestimin e Sahit Dollapit. Sipas saj sekretari organizativ i PD është një dhunues.
“Presidenti i Republikës ka ngatërruar padashje dhunuesin Sahit Dollapi, sekretar për protestat në PD, me të dhunuarin Besfor Kryeziu, gazetar i TCH, i dhunuar nga ndjekësit e zotit Dollapi! Ai ka dashur të thotë që të çohet në spital Besfori jo Sahiti dhe prandaj, meqë të gjithë e mirëkuptojmë Presidentin kur ka protesta, thashe t’i vij në ndihmë me këtë korrigjim”, shkruan ministrja Elisa Spiropali.
Më herët në një reagim të vetin, presidenti Meta kërkonte që “Sahit Dollapi të shoqërohet për në spital për të marrë ndihmën e parë për lëndimet dhe jo të mbahej në polici”. Policia ka shoqëruar sekretarin organizativ të Partisë Demokratike, Sahit Dollapi. Nga pamjet filmike duket se oficerët e ndërhyrjes së shpejtë godasin zotin Dollapi. Sipas PD, ky i fundit nuk po kryente asnjë veprim të dhunshëm, thjesht po vendoste maskën kundërgaz./ Opinion.al
