Të rinjtë e Partisë Demokratike do të zhvillojnë protestën e radhës në 19 dhjetor.
Lajmin e ka dhënë kreu i FRPD, Besart Xhaferri nga selia blu, teksa deklaron se do të solidarizohen me studentët dhe do të mbështesin shqetësimet e tyre.
Mësohet se të rinjtë demokratë do t’i bashkohen marshimit nga Qytet Studenti në Ministri të Arsimit.
“Në 19 dhjetor, të enjten ora 12:00, ju ftojmë t’i bashkoheni protestës marshim të të rinjve të FRPD dhe GRUD nga Qyteti Studenti drejt MAS. Çdo student dhe çdo i ri që kërkon që arsimi të mos bëhet kurban i Edi Ramës dhe korrupsionit të tij është i ftuar në na bashkohet në këtë marshim dinjiteti ne emër të Universitetit.
Në 2018 kur premtoi Paktin për Universitetin për të shuar protestat studentore, që nuk i vuri nën kontroll me taborrin mediatik dhe patronazhistët e FRESH, Edi Rama u zotua se duke nisur nga 2019 për arsimin do shkonte 5% e PBB.
Po përgjatë këtyre viteve kjo rezultoi mashtrimi i radhës, teksa për buxhetin e vitit 2025, për arsimin në tërësi është parashikuar të jepet vetëm 2,45 % të PBB të vendit ose ndryshe 62.2 miliardë lekë, më pak se gjysma e asaj që ishte premtuar. Konkretisht për arsimin parauniversitar të përgjithshëm do jepet 1,79 % e PBB, për arsimin profesional është planifikuar vetëm 0,17 % e PBB dhe për arsimin e lartë projektuar vetëm 0,49% e PBB.
Edi Rama, që kërkon të marrë edhe kompetencat e Kryeshkencëtarit, planifikon që për shkencë të investojë vetëm 0.06% të PBB, në një kohë që miliona euro nga taksat tona alokohen për koncerte tallavaje dhe marketing personal në mediat ndërkombëtare. Asnjë nga 8 pikat e paktit për Universitetin nuk është mbajtur”, tha ai.
