TIRANË- Partia Demokratike po përgatitet për protestën e nesërme dhe marshimin në Bulevardin Dëshmorët e Kombit. Ndërsa bëhen përgatitjet e fundit mësohen disa detaje, përpara publikimit të axhendës zyrtare.
Qytetarët janë të ftuar të mblidhen në orën 11:00 në Sheshin Skënderbej, më pas të gjithë do të marshojnë në Bulevard dhe do të ndalen përballë Kryeministrisë.
Aty do të ngrihet podiumi ku pritet të flasin jo vetëm politikanë por edhe qytetarë. Lideri demokrat Lulzim Basha do të mbajë fjalimin nga fundi i protestës. Ndërsa ende nuk konfirmohet nëse Sali Berisha do t’ju drejtohet me një fjalë të posaçme protestuesve.
Nuk përjashtohet mundësia e gjesteve, si p.sh. gjuatja me vezë drejt Kryeministrisë apo veprime të tjera të kësaj natyre demostrative. Burime zyrtare thanë se protesta do të jetë e gjatë dhe mund të shkojë deri në 5 orë apo më shumë.
