Kryetari i Partisë Demokratike, Lulzim Basha, ka takuar në selinë e PD-së, aleatët e tij ku ka diskutuar angazhimin e radhës së opozitës pas djegies së mandateve.
Në dalje nga takimi me aleatët, kreu i Partisë Republikane, Fatmir Mediu u shpreh se: “Ajo që është e rëndësishme është të koordinojmë veprimet me qytetarët para parlamentit, i cili është tërësisht ilegjitim. Duhet ta kthejmë Shqipërinë në rrugën Europiane. Unë iu thashë se çdo të bëj opozita. Opozita duhet të bëjë çdo gjë që do ta çojë Shqipërinë në binarët kushtetues dhe europian. Problemi më i madh i Shqipërisë është korrupsioni”
Ndërsa kryetari i LZHK-së, Dashamir Shehi, tha se opozita do të ndërrmarrë një sulm 360 gradë ndaj qeverisë Rama, duke shfrytëzuar të gjitha kapacitetet njerëzore që ajo ka.
“Linja dihet. Protesta e radhës do jetë ditën e enjte para parlamentit. Zgjedhje të reja dhe të lira po qenë të zotët të fitojnë prapë. Këto që janë besoj janë diskretituar edhe në rrafshin ndërkombëtar. Ndërkombëtarët kanë marrë pozicionin e vet klasik. Nga pozicioni i sotëm i demokratëve ajo që ishte para tre muajve ka marrë një avancim të madh. Jemi në rrugën për t’i bindur ndërkombëtarët. Nuk e kemi diskutuar këtë punë, do diskutohet pas datës 16. Sulmi i opozitës do jetë 360 gradë”, tha Shehi. Dl/ Opinion.al
