Regjisori Edmond Budina tha se është tërhequr zvarrë sot nga policia së bashku me disa persona të tjerë që po qëndronin tek hyrja e Teatrit Kombëtar.
“Sot është një ditë e trishtë. S’më ka ndodhur as në kohën e Ramiz Alisë. Policia atëherë nuk më ma tërhequr zvarrë. Ajo që ka ndodhur në vendin tim është një nga gjërat më të turpshme. Nuk po mbrojmë shtëpitë tona, por shtëpinë shqiptarëve. Nuk themi që teatri të mos ndërtohet por teatri i ri të ndërtohet diku tjetër.
Ai i ka bërë thirrje autoriteteve se protesta e tyre ka qenë paqësore dhe se nuk është e nevojshme përdorimi i dhunës.
“Ne ishim 5 vetë dhe nuk po bënim asgjë dhe po rrinim tek dera. Është një nga ditët më të dhimbshme. I bëj thirrje kryeministrit. Më ke zënë përkrahu dhe më ke tërhequr zvarrë. I bëj thirrje kryetarit të bashkisë dhe ministrit. Mos ta tentojnë të shkatërrojnë këtë pasuri. Kemi protestuar në mënyrë paqësire. Ky është fundi i demokracisë shqiptare. Ky është regjim fashist.”
Budina i ka bërë thirrje qytetarëve të ngrihen dhe të “mbrojnë lirinë e tyre”
“Populli të ngrihet në këmbë. Teatri duhet të jetë varreza e këtyre njerëzve që i bëjnë keq Shqipërisë. I bëj thirrje aktorëve mos u shisni, mos u kërcënoni për një copë bukë, hajde të mbrojmë lirinë.”
Që në orët e para të mëngjesit policia ka rrethuar godinën e teatrit duke mos lënë njeri që të futet brenda. Nga ana tjetër protestuesit kanë tentuar të hyjnë në godinë duke bërë thirrje që godina të mos prishet. Kjo solli edhe një përplasje të forcave të policisë me artistët dhe qytetarët në mbrojtje të godinës së teatrit. /Opinion.al
