Teksa pritet të nisë protesta e thirrur nga opozita, Ambasada e Shteteve të Bashkuara të Amerikës në Tiranë iu ka bërë thirrje shtetasve amerikanë të qëndrojnë larg vendit ku pritet të mbahet manifestimi.
Në njoftimin e saj ambasada paralajmëron se protesta mund të përhapet në rrugët përreth dhe për ketë arsye këshillon qytetarët amerikanë që të shmangin tubimin.
“Një protestë është planifikuar të zhvillohet në Bulevardin Dëshmorët e Kombit, përballë Kryeministrisë. Kjo protestë ka potencialin të përhapet në rrugët përreth duke shkaktuar bllokime të trafikut, devijime dhe mbyllje të rrugëve”, njofton ambasada e SHBA.
“Qytetarët amerikanë këshillohen të shmangin tubimet e mëdha. Ndërsa shumë ngjarje të mëdha zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme. Monitoroni mediat lokale dhe ndiqni udhëzimet e autoriteteve lokale të zbatimit të ligjit për informacionin më të fundit”, njofton ambasada.
