Detaje të reja janë publikuar në lidhje me mënyrën se si funksiononte rrjeti i prostitucionit në Athinë që shfrytëzonte seksualisht vajza të mitura.
Në pranga ra një 31-vjeçare shqiptare e quajtur Lorela K., së bashku me një 34-vjeçar dhe një klient 45-vjeçar.
31-vjeçarja e arrestuar, e cila kishte rolin e “tutores” vendoste marrëdhënie miqësore me nxënëset e mitura të zonës në Colonos, kryesisht ato 15 vjeçare të cilat më vonë i shtynte drejt prostitucionit duke u gjetur klientë që paguanin shuma parash për marrëdhënie seksuale.
E reja shqiptare jetonte në lagjen Colonos të Athinës dhe është nënë e një djali.
Fqinjët e 31-vjeçares kishin filluar të dyshonin mbi të, pasi kishin vënë re kontakte të shpeshta që ajo kishte me adoleshentet që ishin nxënëse në gjimnazin e zonës.
Sipas një banori të zonës, që prej verës në banesën e 31-vjeçares vinin vajza të mitura, të cilat askush nuk i kishte parë më parë në pallat.
“Vajza ka një djalë. E kam parë ta sjellë këtu. Shumë vajza i vinin në shtëpi, nuk e di sa vjeç ishin. Gjithsesi ishin të vogla. Patjetër nën 18. Kisha parë dy-tre vajza, rreth korrikut dhe gushtit vinin”, thotë banorja e Colonos ndërsa tregon se në banesën e katit të dytë bashkë me “Lorelën” jetonte partneri i saj i arrestuar disa vite më parë për drogë.
“Edhe partneri i saj ka jetuar këtu. Por ai u arrestua për drogë. 3-4 vjet më parë. Nuk e prisja gjithçka që mësova për fëmijët dhe tutorët. E pashë në televizor dhe u mahnita”, thekson ajo.
