Një 60-vjeçar është arrestuar nga policia pasi përmes mashtrimit ka shitur dy herë një apartament në qytetin e Tiranës.
Uniformat blu bëjnë me dije se ka nisur edhe një procedim ndaj një çifti bashkëshortësh, pasi me vetëgjyqësi kanë dëmtuar apartamentin.
Blerësit e dytë E. F., 52 vjeç dhe I. F., 52 vjeç kur kanë mësuar se apartamenti është shitur dy herë, kanë shkulur pllakat e banesës nga zemërimi.
“Specialistët për Hetimin e Krimeve të Komisariatit të Policisë Nr. 3 ndaluan shtetasin A. M., 60 vjeç, banues në Tiranë, si dhe nisi procedimi në gjendje të lirë për shtetasit E. F., 52 vjeç dhe I. F., 52 vjeç (bashkëshortë). Shtetasi A. M. dyshohet se ka shitur 2 herë një apartament, me anë të mashtrimit, ndërsa shtetasit E. F. dhe I. F., me vetëgjyqësi, kanë dëmtuar pllakat e këtij apartamenti, si dhe kanë kundërshtuar punonjësit e Policisë, gjatë shoqërimit”, thuhet në njoftimin e policisë.
Materialet proceduriale në ngarkim të tyre i kaluan prokurorisë për veprime të mëtejshme.
