Prokurorisë së Tiranës iu deshën gati dy vite hetim për të zbuluar skemën e mashtrimit dhe pastrimit të parave, që Fracesco Becchetti kishte ngritur në Shqipëri. Dy ditë më parë, prokuroria dërgoi dosjen në gjyq, duke ngritur 4 akuza ndaj biznesmenit italian.
Në dosjen e siguruar nga Televizioni Klan thuhet se skema e mashtrimit për Prokurorinë fillon në vitin 1997, kur Becchetti fiton konçesionin për ndërtimin e hidrocentralit të Kalivaçit.
Në vitin 2000 në këtë prokjekt nga 49 – vjeçari ftohet dhe “Deutsche Bank”. Ata ngrejnë një kompani të përbashkët “Hidro Srl”, ndërkohë për punimet në kaskadë kontraktohet firma “Energji”, në pronësi të nënës së biznesmenit, Liliana Condomiti, edhe kjo e akzuar nga prokuroria si pjesë e skemës.
Mes kompanisë se Becchetti -t dhe nënës së tij krijohet një konflikt artificial, nga i cili italiani përfitoi 48 milionë euro. Prokuroria thotë se konflikti është krijuar për të mashtruar bankën gjermane dhe për t’i marrë paratë. Këto para, të përfituara në mënyrë të paligjshme nga kompania e nënës së biznesmenit, janë transfruar në llogaritë e të tjera bizneseve të ngritura nga ai në Shqipëri dhe jashtë saj.
Më këto para, të përfitura me anë të skemave të mashtrimit, u ngrit dhe “Agon Channel”, për të cilin pronari i tij, Becchetti, tha se nuk kishte marrë asnjë euro kredi në banka.
Sipas prokurorisë, kompanitë e italianit në Shqipëri kanë mashtruar shtetin shqiptarë duke përfituar rimburshimin e TVSH -së në vlerën e 5 milionë e 800 mijë eurove, duke paraqitur raporte fiktive, se në Kalivaç punohej.
Gjithashtu, Becchetti akuzohet për evazion fiskal, në vlerën e 770 milionë lekëve të reja.
Për të gjitha këto akuza, pritet që në mungesë, Gjykata e Tiranës të fillojë gjykimin për 49 – vjeçarin italian dhe 6 bashkëpunëtorët e tij, që për gati 20 vite ngritën një skemë mashtrimi, duke përfituar miliona euro.
Aktualisht Becchetti ndodhet në Angli ku i është komunikuar akuza dhe urdhër – arresti i lëshuar nga Shqipëria. Ai pritet të ekstrdohet drejt vendit tonë për t’u përballur në gjykatë me 4 akuzat që ka ngritur Prokuroria e Tiranës.
Tv Klan
