Prokuroria pushon çështjen për Lear Kurtin: Ka vdekur nga mbidoza e drogës

Prokuroria e Tiranës ka pushuar çështjen për 32-vjeçarin Lear Kurti. Sipas ekspertizës, i riu humbi jetën nga mbidoza e drogës.

Lear Kurti humbi jetën pas shoqerimit nga Policia ne Komisariatin numer 3 më 19 tetor 2022.

Fillimisht nëna e të riut dhe miq të tij hodhën akuza se Lear Kurti vdiq nga dhuna e ushtruar, sipas tyre nga efektivët në momentin e shoqërimit.

Por ekspertiza, e cila doli më 18 nëntor 2022, arriti në përfundimin se “Shkaku i vdekjes së shtetasit Lear Kurti ka qenë helmimi akut me lëndë narkotike të llojit kokainë, i komplikuar me shok toksik”.

Pjesë nga akti i ekspertimit:

“Në përgjigje të aktit të ekspertimit mjeko-ligjor, përcaktohet diagnoza Anatomo-Patologjike:

Mbidozim (Helimim) akut me lëndë narkotike e llojit kokainë. Ishemi akute Hypoksite e miokardit e shoqëruar me kontraktim dhe deformim të miofibrilive, edemë e shprehur e trurit, stazë vazale dhe ekstravazat kapilar, atelektazë dhe emfizemë kompesatore e mushkrisë, hepatit kronik persistent.

Shkaku i vdekjes se shtetasit Lear Kurti ka qenë helmimi (mbidozim) akut me lëndë narkotike të llojit kokainë, i komplikuar me shok toksik, me mekanizimin e ishemisë akute të miokardit që ka sjellë për pasojë asistolinë kardiake (Ndalim i menjëhershëm i zemrës)”.