Prokuroria e Dibrës ka vendosur që të regjistrojë dosjen 184. Prokuroria e Krimeve të Rënda e transferoi këtë dosje për moskompetencë por procesi u fut në ngërç pasi kishte një konflikt interesi midis kryetares së kësaj prokurorie dhe një prej personave nën hetim në këtë çështje. Por mesa duket prokuroria e rrethit të Dibrës ka vendosur ta marrë përsipër hetimin e një nga dosjeve më të nxheta të momentit.
Dosja 184 shqyrton dyshimet për shit-blerje të votave në zgjedhjet e pjesshme të Bashkisë Dibër në 2016-ën. Në fillim të shtatorit do të hidhet shorti mes dy prokurorëve për të marrë në ngarkim çështjen. Ndërkohë që drejtuesja e Prokurorisë së Dibrës, Esmeralda Keshi (Cani), nuk do të jetë pjesë e shortit. Ajo ka lidhje familjare me Arben Keshin, një nga personat nën hetim që u shfaq edhe në përgjimet e gazetën gjermane BILD. Keshi është kushëri i bashkëshortit të kryeprokurores së Dibrës.
Transferimi i dosjes 184 në prokurorinë e Dibrës është kundërshtuar nga opozita duke e quajtur këtë veprim të prokurorisë së Krimeve të Rënda si një “varrosje” të një prej çështjeve kriminale ku implikohen zyrtarë të lartë shtetërorë. /Opinion.al
