Duke e quajtur arrestimin të ligjshëm, Prokuroria e Tiranës ka kërkuar “detyrim paraqitje” për 13 protestuesit e arrestuar nga policia pas përplasjes në protestën e PD-së, kundër këndit të lojërave të Parku i Liqenit.
Me këtë kërkesë organi i akuzës i është drejtuar sot Gjykatës së Tiranës, pak para nisjes së seancës së planifikuar për procesin në fjalë.
Sipas policisë, pjesëmarrësit në këtë protestë u grumbulluan përpara hyrjes së kantierit në ndërtim, dhe rreth orës 11.30, një grup deputetësh të Partisë Demokratike dhe konkretisht: Edi Paloka, Flamur Noka, Genc Pollo, Albana Vokshi, Arben Ristani, Asllan Dogjani, Keltis Kruja, Gerd Bogdani, Gent Strazimiri, shoqëruar nga protestues të tjerë, me veprime të dhunshme, tentuan dhe çanë me forcë kordonin e Policisë Bashkiake dhe të Policisë së Shtetit të vendosur në mbështetje të Policisë Bashkiake, duke hyrë brenda rrethimit të kantierit në ndërtim të “Këndit të Lojërave për Fëmijë”.
Pjesa tjetër e protestuesve që ishin jashtë këtij rrethimi, vazhduan me veprime të dhunshme ndaj kordonit të policisë Bashkiake dhe të Policisë së Shtetit, duke kërkuar të bashkoheshin me pjesën e protestuesve dhe deputeteve që ndodheshin brenda rrethimit.
Të arrestuarit nga policia për të cilët prokuroria kërkon ‘detyrim paraqitje’ 1. Grigels Muçollari 2. Indrit Hoxha 3. Erjon Dizdari 4. Franci Doka 5. Gerald Metko 6. Silvio Sheme 7. Jurgen Kupi 8. Soven Sheme 9. Arlind Kajo 10. Klejdi Kalaja 11. Ndriçim Babasi 12. Behar Has 13: Tonin Kolthi.
