Për më shumë se dy orë, Cataldo Motta prokurori i anti-mafies së Leçes ka zhvilluar një takim në Prokurorinë e Përgjithshme.
Përveç numrit një të akuzës Adriatik Llalla në takim morën pjesë dhe disa prokurorë të Krimeve të Rënda, të cilët po hetojnë një sërë dosjes së trafikut të drogës drejt Italisë.
Në përfundim të takimit i shoqëruar nga drejtuesi i krimeve të rënda Besim Hajdarmataj , Motta ka dhënë një konferencë për mediat. Në fjalën e tij ai u fokusua tek bashkëpunimi mes dy vendeve duke sqaruar se situata është e tillë që në këto momente duhet një bashkëpunim më i madhe se më parë.
Ndërsa për çështje konkrete hetimore si rasti i pilotit Guido Guidi, prokurori italian ka refuzuar të flasë.
Prokurori i anti-mafies se Leçes: Jam i vjetër por një gjë që besoj është bashkëpunimi. Kemi bërë një verifikim të hetimeve që i kemi të përbashkëta. Hetimet qe po kryhen janë për sasitë e drogës së kapura në brigjet italiane por edhe dosje të tjera për të cilat nuk mund te flas. Situata është e tillë që duhet një bashkëpunim më i madhe se më përpara. Drogë më shumë është kapur në Itali gjatë kësaj periudhe.
Motta është pritur në një takim ditën e mërkurë nga ministri i Brendshëm, Saimir Tahiri. Gjatë takimit u vlerësua bashkëpunimi i deritanishëm mes autoriteteve ligj-zbatuese në të dy vendet, si dhe nevoja e zgjerimit dhe intensifikimit të këtij bashkëpunimi./ TV KLAN
