Operacioni Forca e Ligjit ka bërë sot publik emrat e tre personave të tjerë të cilëve i është kërkuar të plotësojnë formularin e deklarimit të pasurisë.
Në një konferencë për mediat, zëdhënësja e OFL-së tha se ata janë, Dashamir Gjoka, me banim në Durrës, pasi rezulton i dënuar në Itali për veprën penale “Trafik i qenieve njerëzore”. Emiljano Hysenaj, me banim në Durrës, pasi rezulton i dënuar në Gjermani për trafikim narkotikësh dhe pastrim parash. Edlir Hysenaj, banues në Durrës, me lidhje familjare me Emiljano Hysenajn, pasi dyshohet se gëzon pasuri të prejardhura nga krimi.
Deklarimi i këtyre personave do ti shkojë SPAK për vlerësim dhe më pas çështja do ti kalojë Gjykatës së Posaçme Kundër Korrupsionit dhe Krimit të Organizuar.
Po kush janë personat me të shkuar kriminale të cilëve OFL i ka kërkuar të deklarojnë burimet e pasurisë.
Dashamir Gjoka është i njohur për atentatin që iu bë në Shijak në gusht të vitit 2017 teksa lëvizte me automjetin e tij së bashku me të bijën. Ai ka qenë i dënuar në vitin 2007 në Itali nga gjykata e Milanos për veprat penale “shfrytëzimi i prostitucionit” dhe “trafikimi i personave”. Ndaj këtij personi në vitin 2009, në kuadër të ligjit Antimafia është bërë sekuestrimi i disa pasurive, përfshirë edhe kompleksin “Gjoka” në Shijak. Megjithatë Apeli i Krimeve të Rënda ja ktheu përsëri pasurinë e sekuestruar Gjokës pasi argumentoi se ai i justifikonte ato në bazë të investimeve të bëra.
Emiljano Hysenaj është një tjetër person me aktivitet kriminal të provuar jashtë Shqipërisë. Ai është arrestuar në Gjermani në vitin 2018 si pjesë e një grupi prej 13 të arrestuarish të cilët ishin përgjegjës për trafikimin e 1.8 kokainë e cila kapte vlerën e 400 milion eurove. Emri i tij është përmendur edhe pasi në Shqipëri u bllokua sasia pre 613 kilogramësh kokainë në kontinierët e Arbër Cekajt në Maminas të Durrësit. Autoritetet gjermane në atë kohë u interesuan për këtë rast pasi ai sipas tyre ishte i ngjashëm me skemën e përdorur nga grupi i Hysenajt. Ai ndodhet aktualisht në burg në Gjermani por dyshohet se familjarë të tij operojnë në Shqipëri prona dhe biznese të krijuara me të ardhura nga aktiviteti i tij kriminal. /Opinion.al
