Shumë e quajnë si “Beppe Grillo ukrainas”, por historia e Volodymyr Zelenskit është e ndryshme nga ajo e themeluesit të “Lëvizjes Pesë Yjet” në Itali, megjithëse i bashkon e kaluara si komedianë para hyrjes në politikë.
I lindur më 25 janar 1978 në Krivoj Rog, një qytet i madh industrial në Ukrainë, Zelenski njohu pikërisht në shkollën e qytetit të tij bashkëshorten aktuale, Elena Zelenskaya. Ajo është tre vite më e madhe se ai dhe kanë dy fëmijë: Alexandra, e lindur në vitin 2008 dhe Cyril i lindur në vitin 2013.
Gjithsesi, historia e tyre e dashurisë nisi disa vite më vonë, pasi ndoqën universitete të ndryshme. Pas studimeve, ai bëri një praktikë dy mujore si avokat, përpara se t’i dedikohej me kohë të plotë aktrimit. Në fillim me disa grupe vallëzimi, ndërsa në vitin 2009 filloi të merrte pjesë në disa filma. Më vonë, themeloi “Kvartal 95”, shoqërinë e tij të prodhimit kinematografik.
Suksesi erdhi në vitin 2015 me serinë televizive “Shërbëtori i Popullit”, ku interpreton rolin e një njeriu të zakonshëm që bëhet president i Ukrainës. Në vitin 2016 mori pjesë në edicionin ukrainas “Dancing with the Stars”, gjë që ia shtoi edhe më shumë popullaritetin, deri në vitin 2018 kur themeloi partinë “Shërbëtori i Popullit”.
Por nuk mungojnë as hijet në këtë rrugëtim politik të Zelenskit. Janë të shumtë që e akuzojnë për lidhje me Igor Kolomoisky, oligarku ukrainas, një ndër më të pasurit e vendit, që zotëron edhe kanalin televiziv “1+1” ku jepet edhe seria televizive “Shërbëtori i Popullit”. Dyshimet janë se fushata jo vetëm që është financuar nga Kolomoisky, por se gjithçka ka qenë e ideuar nga ai. Në vitin 2015, oligarku dha dorëheqjen nga posti i guvernatorit të Dnepropetrovsk, pikërisht pas përplasjeve me presidentin Porošenko dhe skandaleve financiare.
Duhet thënë se pas Zelenskit gjatë fushatës elektorale kanë qëndruar figura të njohura politike. Aktori është ndihmuar nga ish-Ministri i Ekonomisë Aivaras Abromavicius dhe ish-Ministri i Financave Aleksandr Danylyuk, ndërsa stafi i tij i ka garantuar investitorëve se do të përmbushë zotimet e marra gjatë fushatës.
Përtej shumë vendimeve të tjera, Zelenski ka premtuar se çdo çështje me impakt publik do të hidhet në referendum për t’u votuar nga populli, pasi ai është thjesht “Shërbëtori i Popullit”./Opinion.al
