Mes trazirave dhe rrëmujës së përgjithshme, që pasoi zgjedhjen e Hashim Thaçit president, një episod i shkurtër i kapur nga pak kamera, kaloi pa vëmendjen e nevojshme. Një deputete e partisë së tij i ofroi kreut të sapo zgjedhur të shtetit një tufë me lule dhe ky i fundit i mbajti vetëm pak çaste në dorë ato, për ti’a përcjellë më pas, me një gjest kalorsiako-teatral nje deputeteje të re të LDK-së që ishte ulur në radhën e parë të sallës. Ajo nuk ishte tjetër veçse Teuta Rugova, bija 25 vjeçare e ish paraardhësit të ndjerë të Hashim Thaçit.
Nga ana e armikut tradicional të Ibrahim Rugovës ai ishte një gjest i menduar mirë. Ai po zgjidhej president dhe kjo qe një lëvizje simbolike që tregonte se ndryshe nga sa e akuzonin ai nuk do të sillej si përçarës por si bashkues, se nuk do të përsëriste fyerjet e tij të dikurshme ndaj Rugovës, por do të tregonte respekt ndaj kujtimit të tij.
Mirëpo kur pamjet filmike të këtij çasti të veçantë dolën, ato shkaktuan një furtunë të vërtetë. Nga njëra anë e bija e re e presidentit u akuzua se kish votuar për armikun e babait të saj. Se ndryshe nga shumë deputetë të partisë së saj që kishin bërë thirrje për të bojkotuar votimin e Thaçit në emër të kujtimit të Rugovës, ajo jo vetëm kishte ndejtur në sallë por dhe kishte pranuar lule prej “armikut”. Një status i një deputeti të Vetëvendosjes që shkroi “Çoi tek varri i babait ose futi në B… ato lule” ishte qershia mbi tortë e këtij debati të ndezur.
Reagime të tjera pasuan.
“Askush nuk do të përmendte prapanicën apo lulet e Teutës, nëse ajo do t kish qenë motra, gruaja apo vajza e një komandanti” shkroi një gazetare kosovare. Me një flajë diferenca bëhej e qartë: Teuta qe një vazhduese e brishtë e politikës paqësore të të atit, përballë vrazhdësisë dhe harbutllëkut të komandantëve.
Po kush është kjo vajzë të cilën publiku Kosovar e njeh si bijën e presidentit Rugova?
Ajo tashmë deputete, nuk është më vajza e vogël, e cila shoqëronte të atin në takime dhe evente të ndryshme brenda dhe jashtë rezidencës, në lagjen “Velani” të Prishtinës.
Teuta, ka vendosur t’i futet seriozisht politikës që kur pranoi të garojë zgjedhet e fundit me ish partinë e babait. Në maj të vitit 2014 Isa Mustafa organizoi ceremoninë e futjes së saj në LDK. (shiko video poshte Lapsi.al) Atëherë Teuta që ka të njëjtën moshë me këtë parti, tha se ajo po e bënte këtë hap në politikë vetëm pasi kishte mbaruar studimet, e bindur se Kosovës i duheshin njerëz të shkolluar në perëndim.
Ajo ka mbaruar shkollimin e mesëm në ”American School” në Prishtinë, ndërsa studimet e larta në ”Rochester Institute of Technology” në Nju Jork. Por pavarësish se e rritur si një “qytetare e botës” ne politikën kosovare ajo nuk le rast pa e përmendur trashigiminë e saj familjare :
« Te jesh femija i nje njeriu sic eshte Presidenti Rugova ka qene sfide dhe krenari. E quaj sfide sepse ne (une, Mendimi dhe Uka) kemi pas nje jete te rrezikuar ne cdo aspekt. Kem jetuar nje jete te izoluar ne shtepine tone ne Velani per me shume se 10 vite. Mirepo respekti dhe shpresa qe kishim per babain na ka mbajtur ne gezim per tere ato vite, ndersa ne anen tjeter ka qene dhe eshte ende krenari te jem bija e Presidentit Rugova kur e di qe ai eshte arkitekti i ketij shteti, ai qe punoi pa ndalur dhe arriti te sjell pavaresine e ketij shteti » i thoshte ajo një portali kosovar që përkujton figurën e Rugovës.
E bukur e shtatlartë, shpesh me poza që i ngjajnë më shumë trupit të brishtë të një fotomodeleje, Teuta Rugova jep pak intervista dhe do të ruajë një profil të ulët në kuvendin e Kosovës. Por jo gjithmonë emri që mban ia mundëson këtë.
Kështu ndodhi edhe këtë radhë kur vajza e brishte 25 vjeçare u vu në epiqendër të zgjedhjes së presidentit të ri. Disa e mallkuan se po tradhëtonte trashigiminë e të atit, disa të tjerë e mbrojtëm po sepse qe bija e tij.
Ndërsa ajo vetëm heshti.
Nuk foli. Në një stil që adhuruesit e Rugovës e njohin mirë : Nganjëherë misteri dhe heshtja në politikë të japin më shumë pikë se të gjitha aksionet sëbashku. Teuta nuk deklaron më kot se do të ecë në gjurmët e të atit. (Lapsi.al)
