Lideri i partisë së pakicës serbe në Kosovë, Oliver Ivanoviç u vra në Mitrovicë mëngjesin e kësaj të marte. Atij iu bë atentat para zyrave të partisë së tij në Mitrovicë dhe ndërroi jetë në spital.
Ivanoviç, kreu i partisë “Liri, Demokraci dhe Drejtësi” është përballur ndër vite me drejtësinë për krime lufte, pasi dyshohej se kishte urdhëruar vrasjen e shqiptarëve etnikë në Mitrovicë në vitin 1999. Kur Ivanoviç u arrestua në janar 2014, shkaktoi protesta në mesin e serbëve të Kosovës, të cilët e panë atë si një përpjekje tjetër për të vënë nën presion pakicën serbe në Kosovë.
Gjykata Themelore në veriun e Kosovës e drejtuar nga Misioni i Bashkimit Evropian për sundimin e ligjit e dënoi me nëntë vjet heqje lirie, politikanin lokal serb. Por ai vuajti vetëm 2 vite burg.
Gjatë luftës në Kosovë, Ivanoviç ishte anëtar i grupit paramilitar serb, i cili patrullonte urën kryesore në Mitrovicë duke e ndarë qytetin në sektorë serbë dhe shqiptarë. Grupi mbrojti veriun e Mitrovicës nga ndërhyrja e ekstremistëve shqiptarë nga pjesa jugore e qytetit. Ivanoviç thuhet se urdhëroi vrasjen e katër shqiptarëve etnikë, të ndodhur në pjesën jugore të Mitrovicës së Kosovës më 14 prill 1999, gjatë konfliktit të armatosur në Kosovë dhe NATO bombardimeve të Serbisë.
Më 27 janar 2014, Ivanoviç u arrestua me kërkesë të Prokurorisë Speciale të Kosovës. Më 10 shkurt 2015, qeveria serbe ofroi garanci se Ivanoviç do të mbetet në dispozicion të autoriteteve gjyqësore në çdo kohë dhe kërkoi lirimin e tij.
Nisma e tij politike u ishte nënshtruar trysnive gjatë zgjedhjeve për pushtetin komunal në tetor të viti 2017, në të cilat fitoi Lista Serbe një forcë politike që është themeluar dhe mbështetet nga Beogradi.
Oliver Ivanoviç ishte në pritje të rigjykimit nën akuzat për krime lufte kundër popullatës civile. Në muajin shkurt të vitit 2017, çështja u kthye në rigjykim nga Gjykata e Apelit në Kosovë, dhe ai tashmë gjykohej në liri.
/Opinion.al
