Të paktën 40% e popullatës prej 7.8 miliardë banorësh në glob do të sëmuren nga koronavirusi SARS-CoV-2 dhe miliona pacientë do të vdesin. Është ky përfundimi në të cilin del profesori i famshëm greko-amerikan Nicholas A. Christakis , në një artikull të publikuar në «Economist» mbi specifikat dhe rreziqet e Covid-19, shkruan Cnn grek.
Sikurse shprehet ai “ne kemi një rrugë të gjatë e të trishtueshme përpara, ndaj duhet të veprojmë mirë dhe me zgjuarsi”.
Profesori thekson se fokusimi vetëm në rastet bazuar mbi transmetimin është i pamjaftueshëm për të ndaluar epideminë. “Na duhet një rrjet më i gjerë, më shumë testime dhe gjurmime të kontakteve”, u shpreh.
Ai foli gjithashtu edhe për vëmendjen e lartë që duhet treguar ndaj personave asimptomatikë dhe që e transmetojnë virusin, për të cilët u shpreh se kërkojnë testime dhe diagnostikime.
“Më mirë një maskë se sa viktima”
Profesori thekson se nëse disa njerëz refuzojnë të përdorin maska, ata duhet të kuptojnë se kjo është më mirë se sa të mbyllësh ekonominë apo të numërosh viktimat.
“Derisa të gjendet një vaksinë efektive dhe e përshtatshme nuk ka asnjë zgjidhje tjetër veç minimizimit të kontakteve, mbajtjes së distancës fizike, kryerjes së sa më shumë testeve dhe sigurisht vendosjes së maskës”, tha ai.
Christakis, një specialist në shoqëritë, lidhjet dhe epidemiologjinë, është autori i librit “Connected”, ndërsa po përgatit së fundi një botim për impaktin e koronavirusit në jetën tonë.
Ai shpjegon për “Economist”, se “tiparet dalluese të virusit pas pandemisë së Covid-19 na tregojnë që në mënyrë të paevitueshme ai do të infetkojë një përqindje të lartë të popullsisë në botë përpara se pandemia të përfundojë.”
Ai thotë se kjo nuk varet thjesht nëse autoritetet do të përgjigjet siç duhet, por edhe nga epidemiologjia e vetë virusit, që është shumë më infektues se sa SARS-CoV-1 i mëparshëm./Opinion.al
