Në Tiranë do të krijohet Akademia e Policisë për Ballkanin Perëndimor.
Lajmi është bërë i ditur nga drejtori i Përgjithshëm i Policisë së Shtetit, Ilir Proda gjatë një aktiviteti në Akademinë e Sigurisë, ku i pranishëm ishte edhe Zëvendësdrejtori i Programit ICITAP të Departamentit të Drejtësisë të SHBA-së, Steven Fields.
Ky i fundit i dorëzoi Drejtorit të Përgjithshëm të Policisë së Shtetit, Ilir Proda, dhe Rektorit të Akademisë, Ilirjan Mando, certifikatën e akreditimit të Kolegjit Profesional të Formimit Policor nga Shoqata Ndërkombëtare e Drejtorëve të Standardeve dhe Trajnimit të Agjencive të Zbatimit të Ligjit – IADLEST.
Ky moment shënon një arritje madhore për arsimin policor në vendin tonë dhe për Policinë e Shtetit.
Gjatë bisedës, Ilir Proda tha se së shpejti do të krijohet në Tiranë, Akademia e Policisë për Ballkanin Perëndimor, duke finalizuar idenë e Sekretarit të Përgjithshëm të Interpolit, Jurgen Stock.
Ai siguroi përfaqësuesit e agjencive ligjzbatuese amerikane dhe të Ngarkuarën me Punë të Ambasadës së SHBA-së, se Policia e Shtetit është e vendosur për të vijuar punët e përbashkëta hetimore dhe operacionale që janë në zhvillim me partnerët strategjikë si dhe me të gjitha agjencitë ligjzbatuese për të finalizuar operacione kundër krimit të organizuar dhe terrorizmit.
