Në prezantimin e anketimit për matjen e perceptimit qytetar mbi nivelin e sigurisë në vend, drejtori i Përgjithshëm, Ilir Proda tha se besimi i qytetarëve tek policia po rritet nga viti në vit.
Gjatë fjalës së tij, Proda deklaroi se 82% e qytetarëve besojnë se siguria në vend është në nivele të larta.
Ai theksoi se është ulur edhe perceptimi për nivelin e korrupsionit.
“Gjatë 2023-2024 policia ka synuar në rritjen e parametrave të sigurisë në përgjithësi dhe shkolla e komunitet në veçanti. Kënaqësi për çdo anëtar të organizatës të shohim se publiku e vlerëson sigurinë në Shqipëri në nivele të larta, gati 82 për qind, shumë pranë mesatares së BE. Sfidë më vete ka qenë menaxhimi i numrit të turistëve të shtuar në vendin tonë. Gjatë vitit kemi prani të tyre. Janë të shumtë që e kanë ndjerë praninë e policisë si në kohë normale ashtu edhe vende të vështira.
Kjo lidhet me vlerësimin e publikut, ku 65 për qind vlerëson se policia po bën punë të mirë ose shumë të mirë. Besimi i komunitetit te policia po rritet nga viti në vit. Kemi ndryshuar mënyrën e punës së policisë rrugore me synim parandalimin. Vlerësojmë pajisjen me radarë automatikë. Perceptimi i korrupsionit nga 74 për qind në 2013 në 53 për qind në 2024. Përmendet faktor ndikimi i rritjes së pagave për punonjësit e policisë si dhe shumë iniciativa të qeverisë. Rezultatet e këtij anketimi do të jenë pjesë e strategjisë dhe programit të punës së policisë së shtetit.”, tha Proda.
