Policia e Kosovës ka bërë një njoftim zyrtar lidhur me mbarëvajtjen e procesit të votimeve sot në Kosovë.
Përmes një komunikate për mediat, Policia e Kosovës ka njoftuar se plani operacional për mbarëvajtjen e procesit zgjedhor, gjatë dhe pas procesit të zgjedhjeve u realizua me sukses në tërë territorin e Republikës së Kosovës.
“Zbatimi i planit policor, bashkëpunimi dhe koordinimi ndërinstitucional ka ndikuar në mënyrë pozitive që i tërë procesi zgjedhor të kalojë i qetë dhe pa ndonjë incident madhor që do të kishte penguar/cenuar procesin zgjedhor, andaj vlerësuar në aspektin e sigurisë, procesi zgjedhor ka kaluar i qetë dhe pa incidente serioze”, thuhet në komunikatë.
Ndërkohë bëhet e ditur se Policia e Kosovës në bashkëpunim dhe koordinim me Prokurorinë e Shtetit, sot kanë regjistruar gjashtë raste, prej tyre tri raste të natyrës penale “Veprat Penale Kundër të Drejtave të Votimit” dhe dy raste penale “Sulm ndaj personit zyrtar – Kanosje“.
Po ashtu janë shoqëruar shtatë persona të dyshuar, ku me autorizim të prokurorit katër prej tyre janë dërguar në paraburgim, kurse tre janë liruar në procedurë të rregullt, raste këto të cilat nuk kanë ndikuar në mbarëvajtjen e procesit zgjedhor./klankosova
