Lulzim Basha ka reaguar për procedimin e 33 personave pas protestës së djeshme të opozitës, ndër të cilët edhe Sekretari i Përgjithshëm i PD-së Gazment Bardhi. Basha shkruan në Facebook se asnjë procedim penal nuk e ndal Partinë Demokratike për të përmbushur misionin, ndërsa thotë se janë përdorur militantë në polici për të goditur qytetarët.
“Asnjë procedim penal nuk e ndal Partinë Demokratike dhe qytetarët për të përmbushur misionin tonë për Shqipërinë si gjithë Europa.
Përdorimi i militantëve dhe ushtarëve të krimit në Polici për të goditur qytetarët dhe kundërshtarin politik është tipari më i qartë i këtij regjimi kriminal: Edi Rama ka ardhur në pushtet me ndihmën e bandave dhe ka zgjedhur të jetë me bandat kundër popullit. Të gjithë bandat, ajo në qeveri dhe ato në rrugë do të dalin para drejtësisë!
Unë dhe Partia Demokratike jemi të vendosur të mbrojmë me çdo mjet të drejtën për të protestuar, të drejtë që e fituam pas 46 vitesh të diktaturës më të përgjakshme në Europë! Numërimi mbrapsht për Edi Ramën dhe bandën në pushtet ka nisur!”, shkruan kryetari i Partisë Demokratike në Facebook.
Policia ka arrestuar 14 persona, 11 i ka proceduar në gjendje të lirë dhe shtatë janë shpallur në kërkim. Gjithashtu është proceduar edhe Gazment Bardhi si organizator i protestës së 16 marsit./Opinion.al
