Problemet e shëndetit mendor janë rritur ndjeshëm. Sipas psikologes klinike Adelina Pjetra, duhet një ndërgjegjësim dhe komunikim më i madh, pasi nëse rastet nuk trajtohen në kohë mund të shkojnë në situata shumë ekstreme, siç ishte dhe rasti i 35-vjeçarit i cili izoloi për më shumë se një vit familjen e tij.
“Paranojat, halucinacionet që kishte personi mund ta çonte dhe drejt një ekstremiteti tjetër. Fakti që prindërit mos të dinë se fëmija ka një shqetësim të caktuar, bën të mundur që mos të merret ndihma në kohën e duhur dhe përshkallëzohet situata.”
Problemet e shëndetit mendor sipas psikologes prekin të gjitha moshat, dhe që prej periudhës së pandemisë është më e shfaqur.
“Që nga pandemia e deri më sot janë shtuar jashtë mase shumë. Nëse dikur kanë qenë më të fshehta, pra personat i vuanin dhe i kishin të brendshme, tani jo. Tani janë në sipërfaqe dhe numër më i lartë i personave që kërkojnë ndihmë pasi kanë probleme të shëndetit mendor. Vihen re që nga mosha 6 vjeç e sipër shfaqin probleme të tilla, nuk ka kufi moshe, statusi apo mirëqenie sociale.”
Një stres i shtuar apo lodhje që zgjat në kohë duhet patjetër t’i drejtojë qytetarët tek specialistët.
“Që në momentin që një mendim ose përjetim të bëhet pengesë për jetën tënde të përditshme, si në punë apo familje, ky është një sinjal. Kur përjeton diçka që nuk lidhet me realitetin ose normalen tënde, është diçka që duhet parë dhe konsultuar.”
Sipas Organizatës Botërore të Shëndetësisë pandemia solli rritje të depresionit dhe ankthit me 25%, ndaj kanë bërë thirrje për një transformim të kujdesit të shëndetin mendor në çdo shtet, me shtim të stafit, kualifikim të tyre dhe qendra rehabilitimi.
Klan News
