Pas kërkesës së përfaqësuesve të komunitetit të Himarës, lidhur me shqetësimet e tyre për problemet e pronësisë, Presidenti i Republikës, Bujar Nishani, zhvilloi sot një takim pune me ta.
Presidenca njofton se përfaqësuesit himarjotë pasi shprehën vlerësimin ndaj Presidentit të Republikës si garant i Kushtetutës për angazhimin e Tij personal dhe institucional në drejtim të zgjidhjes bazuar në të drejtën themelore të pronës dhe mbrojtjes së interesave të çdo qytetari shqiptar, bënë një përshkrim të situatës aktuale dhe zhvillimeve më të fundit dhe paraqitën qëndrimet dhe kërkesat e tyre e bashkësisë himarjote për çështjen e pronave në Himarë.
Kreu i Shtetit shqiptar i siguroi përfaqësuesit e komunitetit himarjot se do jetë një zë i fuqishëm duke përdoruar autoritetin e tij publik dhe institucional duke nënvizuar se kjo është një çështje shumë e ndjeshme, zgjidhja e së cilës jo vetëm do të parandalojë konflikte të panevojshme sociale, por do të mundësojë dhe lehtësojë zhvillimin e mëtejshëm ekonomik.
Në këtë pikë Presidenti theksoi se është i nevojshëm: “harmonizimi i politikave zhvillimore me ruajtjen dhe mbrojtjen e pasurive dhe trashëgimisë historike dhe kulturore”. Presidenti Nishani duke vënë në dukje përgjegjësinë institucionale, shprehu gjithashtu gatishmërinë e tij maksimale për ndjekjen me vëmendje të procesit dhe problematikave të mëtejshme që lidhen me çështjen e pronave, e cila ka të bëjë “me respektimin e lirive dhe të drejtave themelore të njeriut”.
Ndërkohë, Nikollaq Neranxi, drejtori ekzekutiv i komunitetit himarjot ka theksuar se projekti i ri rrafshon shtëpitë shekullore nga Spileja në Potam, e për këtë askush nga zyrtarët nuk jep sqrime.
Në emer te kominitetit, ai kërkoi nga Presidenti, si garant i Kushtetutës, që të ndërhyje menjëherë për ta ndaluar “këtë projekt mafioz i cili në fakt është më shumë se grabitës, ai është një projekt i cili po përgatit genocidin mbi popullin e Himarës, të cilët pasi t’ju grabisin cdo gjë, ti përzënë edhe nga trojet e tyre shekullore. Nuk e dimë se kush përfiton nga ky skenar, por kjo është e vërteta”.
