Presidenti Ilir Meta, ka dalë në një konferencë për shtyp, ku ka reaguar lidhur me deklaratën e ministrit të Jashtëm, Nikos Dendias.
Ky i fundit, në një intervistë për mediat greke është shprehur se çështja e detit do të mund të merrte fund me largimin e presidentit Meta dhe me zgjedhjen e presidentit të ri shqiptar.
Meta është përgjigjur lidhur me këtë çështje, ku është shprehur se:
Më datë 23 maj, javën e kaluar, ministri grek ka vizituar Shqipërinë, duke u takuar me ministren e jashtme dhe kryeministrin. Nga pala greke nuk është kërkuar asnjë takim i ministrit Dendias me Presidentin. Ministri Dendias ndër të tjera është shprehur se u ra dakord që t’ia referojmë çështjen tonë gjykatës në Hagë. Kjo nuk ka ndodhur, tha ministri Dendias, pasi presidenti nuk i ka dhënë autorizimin përkatës. Kjo do ndodhë pas 2-3 muajsh kur të zgjidhet president i ri. Dua të sqaroj se Ministri i Jashtëm, zoti Bushati, përmes kërkesës, 13 shkurt 2018, paraqiti kërkesën për krijimin e grupit negociator. Pas paraqitjes së informacionit shtesë nga ministri i Jashtëm, presidenti përmes aktit në mars 2018-të autorizoi Ministrin e Jashtëm që të lëshonte autorizimin e grupit negociator, për saktësimin e vijës delimituese mes Shqipërisë dhe Greqisë. Grupi negociator është pajisur me autorizim për arritjen e një projektmarrëveshjeje për kufizimin e vijës detare. Midis dy grupeve negociatore janë zhvilluar 3 raunde të negociatave. Presidenti i Republikës pasi është informuar ka konstatuar disa problematika dhe shqetësime serioze. Për të diskutuar mbi ecurinë e procesit negociator mes presidentit dhe kryeministrit në qershor 2018-të u dakordësua që kryeministri t’i udhëhiqte personalisht negociatat me Greqinë, për këtë do të paraqiste një kërkesë të re tek presidenti. Presidenti i Republikës duke konstatuar se kryeministri nuk po i përmbahej zotimeve, me shkresë protokollare presidenti kërkoi ndërhyrjen e kryeministrit pa vonesë, duke marrë drejtimin e këtij procesi, por sërish nga kryeministri nuk pati reagim për këtë gjë. Në mungesë të reagimit të kryeministrit, Presidenti i Republikës sërish me shkresën 327/11 i ri-kërkoi kryeministrit ndërhyrjen e tij që negociatat të udhëhiqeshin nga kryeministri, edhe për këtë kërkesë nuk pati asnjë reagim. Nga kryeministri i cili për periudhën shkurt 2019-të-janar 2021, nuk është përcjellë asnjë kërkesë për pajisjen me autorizim, që ai apo qeveria kanë ndërmarrë mbi kërkesën zyrtare të presidentit.
