Shefi i Wagner-it, Yevgeny Prigozhin, është shfaqur në komunikimin e tij të parë video që nga rebelimi i tij i dështuar në Rusi
Në orët e vona të mbrëmjes së 21 gushtit, Prigozhin u shfaq në një klip – që besohet të jetë regjistruar Afrikë. Video u publikua në kanalet e platformës Telegram të lidhura me grupin Wagner.
Prigozhin shihet duke qëndruar në një zonë shkretëtire dhe me një pushkë në duar. Në prapavijë, shihen edhe shumë njerëz të tjerë të armatosur.
Reuters nuk ka arritur ta verifikonte datën apo lokacionin e xhirimit të videos, por komentet e Prigozhinit dhe disa postime në kanalet pro-Wagner në Telegram sugjerojnë se videoja është incizuar në Afrikë.
“Temperatura është +50, gjithçka ashtu siç na pëlqen. Wagner e bën Rusinë edhe më të madhe në të gjitha kontinentet dhe Afrikën më të lirë. Drejtësi dhe lumturi për popullin afrikan, ne po e bëjmë jetën një makth për ISIS (Shteti Islamik, IS) dhe Al-Kaeda dhe banditët e tjerë”, thotë Prigozhin në video.
Ai më pas thotë se Wagner është duke rekrutuar njerëz dhe se grupi mercenar “do të përmbushë detyrat që i janë vendosur”. Videos iu bashkëngjit edhe një numër telefoni, ku u tha se mund të kontaktojnë ata që duan t’i bashkohen grupit mercenar rus.
