Kryeministri Edi Rama është shprehur se qeveria shqiptare po punon me Microsoft për një model të Inteligjencës Artificiale për prokurimet publike.
Në prezantimin e raportit të monitorimit të OECD/SIGMA, Rama tha se në këtë sektor ka pasur një transformim të madhe edhe pse ka shumë punë përpara.
Ndërkohë theksoi se po punohet me Microsoft në mënyrë intensive dhe se qeveria shqiptare ka siguruar të drejtën e autorit.
“Është shumë gjë e madhe për ne që SIGMA të vlerësoj Shqipërinë në krye për prokurimet publike. Unë e besoj që kemi bërë një transformim shumë të madh dhe këtë e tregojnë të dhënat pavarësisht që në këtë rast perceptimi është krejt tjetër. Dua t’i them një gjë mikut tonë të SIGMËS që 80% është një shifër jo e keqe sepse në Greqi janë nja 96% që e thonë që ka korrupsion.
Nuk e di sa vende të BE ishin me perceptimin mbi 80, që natyrisht është një çmenduri, por në këtë kohë kur sistemi është shumë i kërcënuar nga rrjetet sociale çdo gjë mund të dëgjohet dhe përgjithësisht ata që janë më të pabesueshmet bëhen edhe më tërheqëse dhe përsëriten më shpesh.
Dua thjesht të them që edhe në prokurimet publike ne nuk jemi absolutisht të kënaqur dhe jemi duke punuar për një model të inteligjencës artificiale që ta çojmë edhe tek prokurimet publike.
Të kemi në një masë shumë të madhe instrumentin teknologjik që bën procesin. Kjo do të bëjë që prokurimet të jenë shumë herë më tepër transparente, më të shpejta, të krijojnë mundësi për punonjësit e administratësh që të merren me çështje të tjera. Janë një ushtri e tërë që normalisht nuk janë as të detyruar dhe as nuk mund tua kërkosh që të din çdo gjë”, tha Rama.
