Presidentja e Republikës së Kosovës, Vjosa Osmani, ishte ditën e sotme në Tiranë, ku mori pjesë në samitin e SEECP-së.
Në një deklaratë për mediat, Osmani deklaroi se propozoi në tryezën e diskutimeve, përballë homologëve të saj, që të hiqen sanksionet e Bashkimit Evropian të vendosur ndaj Kosovës. Për këtë gjë, ajo tha se Serbia ishte kundër një gjëje të tillë.
“Kosova ishte dakord për deklaratën e përbashkët, e cila është punuar për javë të tëra nga ekipet tona dhe e cila konfirmon rrugëtimin tonë drejt institucioneve euro-atlantike. Pra, përveç perspektivës brenda BE, aty përmendet edhe NATO, si një organizatë që kontribuon jashtëzakonisht shumë për sigurinë dhe paqen. Përveç perspektivës së rajonit tonë, aty është një kapitull i veçantë që flet për zhvillimet gjeo-politike, që ndër të tjera nga agresioni rus kundër Ukrainës dhe respekton në tërësi integritetin territorial dhe sovranitetin e Ukrainës. Pastaj, një pjesë që solidarizohet me viktimat e luftërave në Lindjen e Mesme. Si Republikë e Kosovës, kemi qenë në dakordësim të plotë sa i përket kësaj deklarate.
Megjithatë, meqenëse ajo deklaratë nuk kishte asnjë pjesë ku shtetet do të kërkonin heqjen e masave të padrejta të BE ndaj Republikës së Kosovës, unë kam propozuar që po ashtu të ketë një paragraph të tillë, sepse edhe shtetet e BE-së që janë aty, edhe shumë shtete të rajonit nuk është se janë kundër. Natyrisht, Shqipëria, është një prej shteteve që më së shumti avokon sa i përket heqjes së masave. Por, siç mund të prisni, Serbia ishte kundër edhe për një çështje të tillë, e cila në fakt politike, por është në thelb humanitare, sepse ka të bëjë me projekte që prekin drejtpërdrejt me jetën e qytetarëve tanë”, tha ajo.
Kështu, teksa Presidentja e Kosovës deklaroi se ky shtet ishte pro kësaj deklarate të përbashkët, Osmani tha se Serbia ka qenë shteti i vetëm që tha se ishte kundër deklaratës së përbashkët. Në këtë deklaratë përmendej Rusia në lidhje me sulmin e saj ndaj Ukrainës, si dhe situata aktuale në Lindjen e Mesme, ku Izraeli dhe Irani janë në luftë mes tyre.
Presidentja Osmani, vlerësoi se këto qëndrime të Serbisë, provojnë se kjo e fundit sheh si aleatë vetëm Rusinë, Iranin dhe Kinën, e jo aleancat të bazuara në vlera evropiane e demokratike.
“Sa i përket qëndrimeve të Serbisë, se Bosnja Hercegovina nuk është deklaruar kundër aty brenda në takim. Ndoshta pas takimit ka pasur ndonjë gjë. Nuk ka pasur një deklarim kundër. Ka pasur diskutime se çfarë do donin më shumë, mirëpo nuk ka pasur deklarimin e tillë se ‘unë nuk e votoj’. ‘Unë votoj kundër’ ka pasur deklarim vetëm nga Serbia. Pra, në fakt, Serbia është shteti i vetëm që refuzoi sot brenda takimit, Serbia ishte shteti i vetëm që tha unë nuk e pranoj këtë deklaratë dhe unë votoj kundër. Arsyetimi i Serbisë ishte se ata ishin kundër pjesës ku dënohet agresioni rus ndaj Ukrainës. Ishin kundër pjesës ku flitej për Lindjen e Mesme dhe ishte kundër pjesës ku flitej për NATO-n. Besoj e gjitha kjo, na jep ne një pasqyrë shumë të qartë, që Serbia nuk është pjesë e aleancave të bazuara në vlera, por si aleatë sheh Rusinë, Iranin dhe Kinën”, tha ajo.
