Presidentja e Komisionit Evropian, Urusla von der Leyen, u shpreh se udhëheqësit politikë “e nënvlerësuan” shkallën e rrezikut që paraqet koronavirusi.
“Mendoj se të gjithë ne, që nuk jemi ekspertë, e kemi nënvlerësuar fillimisht koronavirusin”, tha von der Leyen në një intervistë për gazetën gjermane, Bild.
“Tani, është e qartë se ky është një virus që do të na mbajë të zënë për një kohë të gjatë”, shtoi ajo.
Megjithatë, von der Leyen refuzoi të përdorë gjuhën e presidentit francez, Emmanuel Macron, i cili e krahasoi shpërthimin e koronavirusit me luftë dhe urdhëroi popullin francez të qëndrojë në shtëpi për së paku dy javë.
“Personalisht, nuk do ta përdorja këtë term, por e kuptoj qëllimin e presidentit të Francës, sepse koronavirusi është një armik shqetësues”, tha von der Leyen.
Koronavirusi, u shfaq fillimisht në Kinë në fund të vitit të kaluar, dhe tani ka përfshirë gjithë globin, duke infektuar afro 200,000 njerëz dhe duke shkaktuar mbi 7,950, viktima./Opinion.al
