Pengmarrja e një autobusi përfundoi në qytetin ukrainas Lutsk të martën mbrëma pasi Presidenti Volodymyr Zelensky ra dakord me njërën nga kërkesat e pazakonta të personit të armatosur – të rekomandojë një dokumentar të vitit 2005 në lidhje me abuzimin e njerëzimit ndaj kafshëve.
Një burrë i armatosur me një pushkë dhe granata rrëmbeu një autobus me 13 persona në bord të martën në mëngjes, duke pretenduar se ai kishte vendosur eksploziv në automjet dhe në një vend tjetër të largët, të cilin mund ta shpërthejë nga distanca, sipas zyrtarëve.
Burri, i identifikuar nga autoritetet si 44-vjeçari Maksym Kryvosh dhe që përdori pseudonimin Maxim the Bad postoi një manifest “anti-sistem” në mediat sociale, duke kërkuar që dhjetëra zyrtarë të qeverisë të pranojnë se janë “terroristë”, ndër të tjerë.
Në orët e para të pengmarrjes, Kryvosh dyshohet se hapi zjarr dhe hodhi një granatë në drejtim të policisë, sipas Ministrisë së Brendshme të Ukrainës. Policia Kombëtare e Ukrainës më vonë tha që specialistët e saj kishin arritur të çmontonin granatën dhe ajo nuk shpërtheu.
Zelensky foli drejtpërdrejt me pengmarrësin përmes telefonit, duke rezultuar në lirimin e tre pengjeve, tha zyra e tij e shtypit. Të tjerët u lanë të lirë pasi presidenti ukrainas postoi një video të shkurtër në faqen e tij zyrtare në Facebook duke thënë: “Të gjithë shikojnë dokumentarin e vitit 2005 “Earthlings”
Dokumentari, i transmetuar nga Joaquin Phoenix, trajton abuzimin dhe vuajtjen e kafshëve në industrinë e agrikulturës. Videoja e Zelensky u fshi pasi Kryvosh u dorëzua dhe pengjet u liruan. Nuk raportohen vdekje apo plagosje.
Zelensky më vonë falënderoi policinë për operacionin e suksesshëm dhe justifikoi vendimin e tij për të përmbushur kërkesat e pengmarrësit duke thënë në një postim në Facebook se “jeta e njeriut është vlera më e rëndësishme dhe ne nuk e humbëm askënd”.
“Bisedimet zgjatën për rreth 9 orë, të gjithë biseduan me të, nga psikologë deri tek negociatorë specialë, por ai dëshironte që vetëm një gjë, kërkesat e tij të përmbusheshin” tha Zelensky në një video të publikuar nga ai.
“Kështu që ne patëm një këshill dhe unë doja të flisja me këtë njeri. Para kësaj ai foli me të gjithë për 10-15 sekonda dhe më pas e mbylli, por pastaj ne arritëm të bisedonim për 7-10 minuta dhe arritëm një marrëveshje që ai do të bëjë lëvizjen e parë për të liruar qytetarët tanë ”.
Të mërkurën Kryvosh u akuzua për terrorizëm, marrje peng dhe mbajtje pa leje të armëve, sipas Ministrisë së Brendshme të Ukrainës. Zyrtarët e ministrisë së brendshme shtuan se ai më parë kishte kaluar gati një dekadë në burg për mashtrim, zhvatje, shitje të paligjshme të armëve të zjarrit dhe eksplozivëve. /Opinion.al
