Presidenti i SHBA-së, Donald Trump ka zhvilluar një telefonatë me homologun e tij kinez, Xi Jinping.
Thirrja telefonike u raportua për herë të parë nga media shtetërore kineze dhe u konfirmua nga ministria e jashtme kineze.
Sipas mediave shtetërore kineze, ishte Trump ai që telefonoi Xi-në dhe në fokus të bisedës ishte lufta tregtare mes dy vendeve, transmeton Sky News.
“Më pëlqen Presidenti Xi i Kinës, gjithmonë më ka pëlqyer dhe gjithmonë do ta pëlqej, por ai është shumë i ashpër dhe jashtëzakonisht i vështirë për të bërë një marrëveshje me të!!!”, tha Trump në një postim në faqen e tij Truth Social.
Presidenti amerikan ka ulur tarifat e tij prej 145% për mallrat kineze në 30% për 90 ditë për të lejuar bisedimet, ndërsa Kina uli taksat e saj për mallrat amerikane nga 125% në 10%.
Lufta tregtare ka prodhuar luhatje të forta në tregjet globale dhe kërcënon të dëmtojë tregtinë midis dy kombeve.
Kujtojmë se dje Trump zhvilloi një bisedë telefonike me presidentin rus Vladimir Putin.
