Presidenti i Republikës, Bujar Nishani, ka kërkuar nga Malësia e Madhe ku ishte sot, hetimin e krimeve të komunizmit, si edhe kërkoi heqjen e nga drafti i reformës për drejtësi nenet që pengojnë hetimin e krimeve te kohës së diktaturës.
“E quaj të papranueshme hartimin dhe tendencën e një neni të tillë nga të ashtuquajturit ekspertë të reformës në drejtësi, për të vendosur në Kushtetutë një nen që ndalon njëherë e përgjithmonë hetimin e krimeve të komunizmit. Nga kjo tokë martirësh i bëj thirrje deputetëve të përgjegjshëm të Kuvendit të Shqipërisë që të mos e miratojnë këtë nen”, tha kreu i shtetit.
Nishani ka folur gjithashtu edhe për mosdekretimin e ligjit të pronave dhe dërgimin e tij në Gjykatën Kushtetuese.
“Para pak ditësh të gjithë ne, shumë si ne, nuk do ta besonin që 2016 mund të vinte me një ligj të Parlamentit i cili do të kërkonte rikonfiskimin e pronave të shqiptarëve. Rikonfiskimi i pronave nuk mund të ndodhë dhe nuk do të ndodhë”, theksoi Nishani.
