Presidenti i Republikës, Bujar Nishani ka vendosur ditën e sotme që të anulojë takimin me ambasadorët shqiptarë që do të punojnë në vende të ndryshme të botës.
Pas pritjes nga kryeparlamentari Meta dhe kryeministri Rama, ambasadorët kanë shkuar edhe te Presidenti i Republikës.
Por ky i fundit nuk ka pranuar t’i takojë. “Panorama” mëson se Presidenti nuk dëshironte të takonte ambasadorët që nuk i ka dekretuar, siç është ai i Vatikanit, Visar Zhiti, për të cilin pati edhe përplasje politike, raporton panorama.
Kujtojmë se ka qenë Kryeministri Rama që e propozoi për ambasador në Vatikan, por që pati përplasje me Presidentin.
Ky i fundit refuzoi ta dekretonte dhe tashmë Zhiti është thjesht i ngarkuar me punë në Vatikan.
Ambasadorët kanë pritur për sqarim, deri sa ka dalë nga Presidenca shefi i Kabinetit dhe u ka thënë se Presidenti nuk i pret.
