Derbi luhet këtë të premte në orën 14:00. Kështu vendosën Federata Shqiptare e Futbollit dhe klubet, bazuar në rregullore, por Partizani kërkon pikët në tavolinë.
U nisën për festë, pa e ditur se çfarë do të ndodhte. Tifozët e Tiranës dhe Partizanit nuk mundën ta shijonin deri në fund derbin e radhës në kryeqytet. Për herë të parë që kur ka nisur të luhet në mbrëmje, ndeshja u detyrua të shtyhet.
Forca madhore, defekti elektrik dhe mungesa e burimit rezervë për energji, detyruan Federatën Shqiptare të Futbollit dhe klubet të pranonin mospërfundimin e përballjes, dhe luajtjen në orën 14:00 të kësaj të premteje.
Tirana, organizatorja e takimit, e ndjeu për detyrim të jepte sqarimin e saj.
Zëdhënësi Arbi Laçi dha versionin e klubit. Gjithsesi, ka edhe një version tjetër, ai i Operatorit i Shpërndarjes së Energjisë Elektrike.
Institucioni shtetëror pranon defektin e zgjeruar në kryeqytet, por shton se klubi i Tiranës nuk i ka kërkuar bashkëpunim për linjë shtesë, ndërsa kërkesa nga ana e OSHEE-së është bërë. Jo vetëm kaq, por Operatori thotë se në derbi, punonjësit e saj nuk janë lejuar për të bërë të mundur mbarëvajtjen e ndeshjes. Ndërkaq, i menjëhershëm dhe i qartë reagimi i presidentit të Partizanit, Gazmend Demi.
Si shpesh herë kohët e fundit, përballjen e ndoqi edhe vëllai I kryeministrit shqiptar, Olsi Rama. Ish-basketbollisti njihet si tifoz i Partizanit.
Edhe largimi i skuadrave pati telashe. Partizani i mori masat për të përcjellë skuadrën, e cila do të vazhdojë të jetë e grumbulluar në hotel.
Bardheblutë nuk e patën këtë fat. Autobusi nuk erdhi dhe ata u larguan në mënyrë individuale.
