Presidenti i Filipineve, Rodrigo Duterte ka tërhequr sërish vëmendjen me deklaratat e tij. Ai tha se dikur ka qenë “gay”, teksa shtoi se e kanë shëruar femrat e bukura. Presidenti theksoi se “u bë burrë sërish” pasi njohu ish-bashkëshorten.
“Si përfundim, femrat e bukura më shëruan. Ato janë ilaçi im”, shtoi Duterte, e më pas u kërkoi pesë grave të publikut të çohen e ta puthin në faqe.
Në një nga fjalimet e tij, Duterte tha se një nga kritikët më të ashpër që ka, senatori Antonio Trillanes, ishte homoseksual. Sipas Dutertes, një tjetër homoseksual i kishte thënë që nga mënyra se si flet e si lëviz, Trillanes është pa dyshim homoseksual.
“Trillanes dhe unë jemi të ngjashëm. Por, unë u kurova”, tha Duterte.
Presidenti ka bërë disa herë deklarata tallëse ndaj homoseksualëve dhe përdhunimeve, ndërsa vitin e kaluar pranoi se kur ishte adoleshent, kishte prekur në mënyrë të pahijshme shërbyesen e shtëpisë.
“Vetëm nëse nuk rënkon quhet përdhunim”, ka thënë duke qeshur më herët Presidenti.
Sipas aktivisteve, një grua apo fëmijë përdhunohet çdo orë në Filipine sot, një rritje kjo e numrit të sulmeve në nivelin 153% krahasuar me dekadën përpara se Duterte të zgjidhej President./Opinion.al
