Në prani edhe të Presidentit të Francës Emmanuel Macron, Presidenti grek dha mesazhe të qarta për Shqipërinë duke u përfshirë përsëri në debatin e të drejtave të minoritetit grek në Himarë.
Gjatë pritjes që i bëri në Pallatin Presidencial Presidentit Macron i cili po zhvillon vizitë zyrtare në Greqi, Prokopis Pavlopoulos u shpreh se Shqipëria po minon integrimin në Bashkimin Europian duke iu referuar prishjes së ndërtimeve pa leje në Himarë.
“Mesazhi i Greqisë për Shqipërinë fqinje është: kur merr masa, që janë qartësisht në kundërshtim me rregullat e BE, dhe që shkelin brutalisht të drejtat themelore të njeriut dhe në veçanti të pronës, gjithashtu minon perspektivën europiane”,tha Presidenti i Greqisë.
Të njëjtin mesazh paralajmërues për bllokim të hapjes së negociatave me BE-në, Pavlopoulos dha edhe për Maqedoninë, të cilës i kërkon të zgjidhë çështjen e emrit.
Në pritjen për Presidentin Macron dhe Zonjën e Parë të Francës, ishin të pranishëm edhe Kryeministri i Greqisë e bashkëshortja e tij, kryetari i opozitës, kryepeshkopi i Athinës, ministra, politikanë e biznesmenë.
