Deklaratave të kreut të grupit parlamentar të PS, Taulant Balla, se Presidenti “i vjen anash” Kuvendit, i është përgjigjur zëdhënësi i presidencës.
Në një status në Facebook, Tedi Blushi ironizon Ballën dhe shkruan që t’i “lutet zotit” që populli të mos kthehet në problematik.
“Ciu Ciu Tao Tao. Të duket vetja i fortë ngaqë rri me çuna problematikë, por lutju Zotit që të mos kthehet i gjithë populli në “problematik”. Tao Tao, harroje zërin e Bablokut! Dëgjoje zërin e popullit! Është zëri i zotit!”, shkruan zëdhënësi i presidentit.
Në një dalje për mediat më herët Taulant Balla tha se nuk kemi të bëjmë “me marrëdhënie institucionale mes presidentit dhe kuvendit” por me “një garë të brendshme mes opozitës, për lidershipin e saj”.
Balla tha gjithashtu se Presidenti nuk e shkarkon dot Kuvendin por e kundërta mund të ndodhë.
“Diskutohet me pathos në lloj lloj banaku, dyshemeje, rruge, bulevardi se njëri që fryhet e do dali e do shpërndaje Kuvendin e këto historira. Republika e Shqipërisë është parlamentare, e kulluar parlamentare dhe presidenti Ilir Meta i zgjedhur në atë detyrë nga kuvendi, e di fare mirë këtë mungesë të së drejtës së presidentit për të pasur këtë lloj qasje në marrëdhenie me Kuvendin, Kuvendi e shkarkon presidentin dhe procesi certifikohet nga gjykata Kushtetuese, presdenti i vjen anash Kuvendit, në kuptimin e së drejtës kushtetuese për të shpërndarë Kuvendin. Presidenti duhet të kuptojë qartë se është në hetim nga kuvendi për shkejet e njëpasnjëshme kushtetuese, e nxis komisionin hetimor që të kemi mundësi sa më shpejt që të lexojmë para shqiptarëve. Uroj që gjithë ky agravim të mos vijë nga fakti që Meta e konsideron veten si pjesë të KÇK”, tha Balla. /Opinion.al
